Corné is oor die afgelope ongeveer 3 dekades goed toegerus om die leisels in hand te hê by Radio Nuwe Lied. Hy begin sy padjie na skool met B.Sc (Agric) by TUKS. Toe ontmoet hy 'n baskitaar en studeer kontemporêre musiek by die destydse Pretoria Technikon. Hierna pak hy Teologie aan, eers by RAU en toe SATS. 

​

Corné was bevoorreg om gedurende sy musiekloopbaan die opnameateljee en verhoog te deel met die room van SA se vermaaklikheidssterre, onder andere Nataniel (vir wie hy 14 jaar lank baskitaar gespeel het), Coenie de Villiers (saam met wie hy SAMA-wenners opgeneem het), Afrikasterre soos Judith Sepuma en Lira en internasionale sterre soos Stef Bos (saam met wie hy die DVD, Wit sand, Rooi Bloed, opgeneem het) en die Chinese popster, Lili Feng, saam met wie hy na China toer.

​

As skrywer en komponis is van sy werke op radio en TV, vir beide sy eie en Huwelied (die duet saam met sy vrou, Heidi) se musiek , sowel as ander kunstenaars. Hy komponeer en vervaardig ook die musiek vir ''n realiteits TV-reeks vir SABC2. 

​

Sedert 2001 is hy en Heidi ook woelig met korporatiewe vermaak as Velvet Motion. Hulle brei later hulle dienste uit na die troumark as Music 4 Weddings. Beidi hierdie dienste is nogsteeds deel van hulle diens aan die wêreld.

​

Aan die bedieningskant van sake, is hy reeds sedert 1996 betrokke by verskeie ander bedienings, meestal deeltyds, maar ook op twee geleenthede voltyds. In 2011 begin hy en Heidi Ware Lewe Bediening. Hulle lei later 'n gemeente waar Corné verantwoordelik is vir die weeklikse prediking. Hulle bied ook saam die lewensveranderende huwelikskursus, Gesonde Geseënde Gesinne (Healthy Happy Homes vir Engelssprekendes), aan.